نكت عامة
مشى هاداك الراجل؟
هادا واحد الطبيب غادي يولد واحد المرا عندها تلاتة ديال التوام خرج الولد اللول لقاه ناعس، وبدا كيضربو حتى فاق وحطو مشى خرج الولد التاني، لقاه حتى هو ناعس، ناض كيضربو حتى فاق وحطو مللي مشى يخرج الولد التالت ما لقاهش، وهو يقول للفرملية صافي كملي نتي خدمتك راه غير جوج ولاد للي كاينين غير مشى الطبيب وهو يخرج الولد التالت راسو بشوية وقال للفرملية: واش هاداك خينا اللي كيسرفق الدراري صافي مشى فحالو؟
الكدوب
واحد كذاب بززززاف قال لواحد صاحبو: أنا خلاقيت ملي كان قوس قزح بيض وكحل !! وهو يرد عليه صاحبو حتى هو طيارة في الكدوب قال له: انا تزاديت فــاش كان البحر الميت باقي مريض فالسبــيطار
مبارك الحولي
واحد الراجل سميتو مبارك، شرى حولي ودخل بيه الدرب شافتو جارتو من الشرجم، وقالت ليه: مبارك الحولي قال ليها: خدوج النعجة
خطيب من داكشي
واحد البنت قالت لباها راه واحد ولد الناس بغى يخطبني وما فيه حتى عيب. قال ليها باها واخا، قولي ليه يجي نشوفو جا الخطيب وجلس مع بات البنت وهو كيمضغ المسكة وهو يقول ليه الراجل: مرحبا بيك أولدي. ولكن واش ما جاتش ف شكل تمضغ المسكة ونتا جاي تخطب؟ قال ليه الشاب: ولكن أ عمي، المسكة ضرورية من بعد ما يكمي الواحد كارو قال ليه الراجل: هي كتكمي؟ قال ليه الشاب: شوية وصافي، مع شي كويس ديال الشراب قال ليه الراجل: وزايدها كتسكر؟ قال ليه الشاب: مرة مرة، ملي كنقمر قال ليه الراجل: وفين كتلعب القمار؟ قال ليه الشاب: ف واحد الكاباري قال ليه الراجل: ومن إمتى ونتا كتمشي للكاباريهات؟ قال ليه الشاب: من نهار خرجت من الحبس قال ليه الراجل: وعلاش دخلتي الحبس؟ قال ليه الشاب: حيت ضربت واحد الراجل بالموس وقتلتو قال ليه الراجل: وعلاش قتلتيه؟ قال ليه الشاب: حيت ما بغاش يجوجني بنتو قال ليه الراجل: على بركة الله، نجيبو العدول دابا
علاش سرطتيه؟
هادا واحد الولد شاف ماماه حاملة و هو يسولها: "أشنو كاين ف كرشك؟" قالت ليه: "هادا خوك" قال ليها: "واش عزيز عليك؟" قالت ليه: "آه" قال ليها: "إيوا إيلا عزيز عليك علاش سرطتيه؟"
الحرشة و البيتزا
هادا واحد مشى للبحر و دا معاه حرشة. جا واحد آخر جاب معاه بيتزا. منين ناض اللول يعوم، التاني تشهى هاديك الحرشة، ناض خداها و حط ليه البيتزا. منين رجع اللول شاف ف هادوك اللي جالسين حدا بلاصته و قال ليهم: شكون تقيى ليا على الحرشة؟
لا كوست
واحد مبوق كيتمشى حدا واحد الواد وهو يخرج لي ه تمساح وهو يقول: يآآآآآآآاه! لا كوست
نتسنى حتى تسالي
واحد المرا دات ولدها عند الفقيه وقالت ليه: سي الفقيه، الله يرحم الواليدين إيلا ما علم ليا ولدي، راه الجامع ديال الدوار ديالنا بقى بلا فقيه. يالله هاني غادي نتسنى فيك قدام الباب حتى تسالي